जागरूक आवाज - ताज्या बातम्या आणि घडामोडी

जिल्हाध्यक्ष भरत राजपूत यांच्याकडून नियुक्ती जाहीर; संघटनात्मक बांधणी आणि आगामी निवडणुकांच्या पार्श्वभूमीवर महत्त्वाचा निर्णय.

पालघर,वार्ताहर 

भारतीय जनता पार्टीने पालघर जिल्ह्यात आपली संघटनात्मक पकड अधिक घट्ट करण्यासाठी मोठे पाऊल उचलले आहे. भाजपचे पालघर जिल्हाध्यक्ष भरत राजपूत यांच्या आदेशानुसार, अ‍ॅड. जयेश आव्हाड यांची पालघर शहराध्यक्षपदी नियुक्ती करण्यात आली आहे. या नव्या नेतृत्वामुळे शहरातील राजकीय वर्तुळात सध्या मोठी चर्चा रंगली असून भाजपच्या गोटात उत्साहाचे वातावरण आहे.

‎पक्ष संघटनेला मिळणार नवसंजीवनी

‎अ‍ॅड. जयेश आव्हाड हे कायदा क्षेत्रातील प्रदीर्घ अनुभव, दांडगा जनसंपर्क आणि सामाजिक कार्यातील सक्रियतेसाठी ओळखले जातात. त्यांच्या निवडीमुळे शहरातील बूथस्तरावरील कार्यकर्त्यांमध्ये चैतन्य निर्माण होणार असून, सुशिक्षित आणि तरुणाईला पक्षाकडे खेचण्यात त्यांना यश येईल, असा विश्वास पक्षश्रेष्ठींनी व्यक्त केला आहे.
‎मोदींचे विचार घराघरात पोहोचवण्याचे उद्दिष्ट

‎पक्षाची ध्येय-धोरणे आणि पंतप्रधान नरेंद्र मोदी यांचे विकसित भारताचे स्वप्न सर्वसामान्य नागरिकांपर्यंत पोहोचवणे हे मुख्य उद्दिष्ट असल्याचे जिल्हाध्यक्ष भरत राजपूत यांनी यावेळी स्पष्ट केले. केंद्र आणि राज्य सरकारच्या जनहितार्थ योजनांची माहिती तळागाळापर्यंत नेणे, महिला आणि युवा शक्तीला संघटनेत सक्रिय करणे ही आव्हाड यांच्यासमोरील प्रमुख जबाबदारी असेल.

'कार्यकर्त्यांची ताकद आणि पक्षाचा विचार हीच प्राथमिकता'
‎शहराध्यक्षपदाची नवीन जबाबदारी स्वीकारल्यानंतर अ‍ॅड. जयेश आव्हाड यांनी पक्षाचे आभार मानले. ते म्हणाले की, "पक्षाने माझ्यावर जो विश्वास टाकला आहे, त्यास मी पूर्णपणे जागण्याचा प्रयत्न करेन. संघटना वाढवणे, कार्यकर्त्यांमध्ये समन्वय साधणे आणि भाजपचा विचार घराघरात पोहोचवण्यासाठी मी अहोरात्र परिश्रम घेईन."
‎
‎या नियुक्तीमुळे पालघर शहरातील राजकीय समीकरणांना नवी दिशा मिळण्याचे संकेत मिळत असून, आगामी काळात भाजपच्या संघटनात्मक विस्ताराचा वेग वाढलेला पाहायला मिळेल.