उच्च न्यायालयाच्या कठोर अटी; दोषारोपपत्र दाखल होईपर्यंत ‘गोवा मुक्काम’
कल्याण-डोंबिवली : शास्त्रीनगर रुग्णालयातील डॉक्टरला मारहाण केल्याच्या प्रकरणात अटक करण्यात आलेले नगरसेवक रमेश म्हात्रे यांना अखेर उच्च न्यायालयाकडून कठोर अटींसह जामीन मंजूर झाला आहे. न्यायालयीन प्रक्रिया पूर्ण झाल्यानंतर शनिवारी सायंकाळी साडेचारच्या सुमारास म्हात्रे यांची आधारवाडी कारागृहातून सुटका करण्यात आली.
मात्र जामीन मिळाल्यानंतरही म्हात्रे यांच्यासमोरील अडचणी पूर्णपणे संपलेल्या नाहीत. दोषारोपपत्र दाखल होईपर्यंत त्यांना महाराष्ट्राबाहेर, गोव्यात राहण्याचे आदेश न्यायालयाने दिले आहेत. तसेच गोव्यातील अंजुना पोलीस ठाण्यात आठवड्यातील ठरावीक तीन दिवस हजेरी लावणे बंधनकारक करण्यात आले आहे.
२० दिवसांनंतर कारागृहाबाहेर
म्हात्रे यांना या प्रकरणात अटक झाल्यानंतर ते तब्बल २० दिवस आधारवाडी कारागृहात होते. उच्च न्यायालयाने घालून दिलेल्या कठोर अटींची पूर्तता केल्यानंतर कल्याण न्यायालयाने सुटकेचा आदेश मंजूर केला.
म्हात्रे शुक्रवारीच कारागृहातून बाहेर येण्याची शक्यता होती. मात्र आवश्यक कागदपत्रांची पूर्तता वेळेत न झाल्याने सुटकेला एक दिवस विलंब झाला. शनिवारी कागदपत्रांची पूर्तता झाल्यानंतर अखेर त्यांची कारागृहातून सुटका करण्यात आली.
जामीनाच्या प्रमुख अटी काय?
म्हात्रे यांचे वकील मुजाहिद काझी यांच्या माहितीनुसार, दोषारोपपत्र दाखल होईपर्यंत म्हात्रे यांनी गोव्यातच राहणे आवश्यक आहे. तसेच या प्रकरणातील समर्थक किंवा प्रत्यक्षदर्शी व्यक्तींशी कोणत्याही प्रकारे संपर्क ठेवता येणार नाही.
या प्रकरणाचा खटला जलदगती न्यायालयात चालविण्यात येणार असून त्यासाठी विशेष सरकारी वकिलाची नियुक्ती करण्यात येणार आहे. खटला पूर्ण होईपर्यंत या विशेष सरकारी वकिलामध्ये बदल करता येणार नाही, अशीही अट न्यायालयाने घातल्याचे सांगण्यात आले.
“माझा न्यायालयावर पूर्ण विश्वास”
कारागृहातून बाहेर आल्यानंतर रमेश म्हात्रे यांनी प्रतिक्रिया देताना सांगितले, “माझा न्यायालयावर विश्वास आहे. हे प्रकरण न्यायप्रविष्ट आहे. न्यायालय जो निर्णय देईल, तो मला मान्य आहे.”
नेमकं प्रकरण काय?
६ जुलै रोजी शास्त्रीनगर रुग्णालयात डॉक्टरला मारहाण केल्याचा म्हात्रे यांच्यावर आरोप आहे. या घटनेनंतर म्हात्रे यांच्यासह तीन जणांविरोधात गुन्हा दाखल करण्यास पोलिसांकडून विलंब झाल्याचा आरोप करण्यात आला होता.
त्यानंतर म्हात्रे यांना अटक करण्यात आली आणि त्यांना पोलीस कोठडी सुनावण्यात आली. पुढे कल्याण न्यायालयाने त्यांना जामीन मंजूर केला. मात्र घटनेचे गांभीर्य लक्षात घेत उच्च न्यायालयाने स्वयंप्रेरणेने या प्रकरणाची दखल घेत म्हात्रे यांचा जामीन रद्द केला.
यानंतर म्हात्रे यांनी पुन्हा विष्णूनगर पोलिसांसमोर शरणागती पत्करली. तेव्हापासून ते आधारवाडी कारागृहात होते. अखेर उच्च न्यायालयाच्या कठोर अटींसह जामीन मंजूर झाल्यानंतर २० दिवसांनी त्यांची कारागृहातून सुटका झाली.
आता न्यायालयाच्या आदेशानुसार म्हात्रे यांचा पुढील मुक्काम गोव्यात राहणार असून, या प्रकरणातील पुढील न्यायालयीन घडामोडींवर सर्वांचे लक्ष लागले आहे.