जागरूक आवाज - ताज्या बातम्या आणि घडामोडी

 

पालघर जिल्ह्यातील तारापूर एमआयडीसी परिसरातील मे. आरती फार्मालॅब्स लिमिटेड, बोईसर येथे रविवारी (दि. २२ मार्च २०२६) दुपारी घडलेल्या किरकोळ रासायनिक घटनेने औद्योगिक सुरक्षेचा प्रश्न पुन्हा एकदा ऐरणीवर आणला आहे. दुपारी सुमारे १:४५ वाजण्याच्या सुमारास डिस्पॅच विभागात Di-Methyl Sulphate (DMS) या धोकादायक इंटरमिजिएट रसायनाची टँकरमध्ये भराव प्रक्रिया सुरू असताना, टँकरच्या वेंट लाईनमधून ओव्हरफ्लो होऊन रसायनाचे अल्प प्रमाण जमिनीवर सांडले.

कारखान्यातील ऑपरेटरने तत्काळ प्रसंगावधान दाखवत फिलिंग व्हॉल्व्ह बंद करून गळती नियंत्रणात आणली. त्यानंतर सुरक्षा पथकाने तातडीने परिसर रिकामा करून कामगारांना सुरक्षित स्थळी हलवले. सांडलेले रसायन लाईम आणि सोडा अॅशच्या सहाय्याने निष्क्रिय करण्यात आले असून ही प्रक्रिया सुमारे २:३० वाजेपर्यंत पूर्ण झाली.

तथापि, डीएमएसच्या वाफांमुळे निष्क्रियकरण प्रक्रियेत सहभागी काही कर्मचाऱ्यांना डोळ्यांत जळजळ जाणवू लागली. सुरुवातीला त्यांना कारखान्यातच वैद्यकीय निरीक्षणाखाली ठेवण्यात आले; मात्र सायंकाळी काहींची लक्षणे कायम राहिल्याने खबरदारीचा उपाय म्हणून २२ कामगारांना बोईसरमधील लाइफलाईन मल्टिस्पेशालिटी हॉस्पिटलमध्ये दाखल करण्यात आले.

डॉक्टरांच्या माहितीनुसार, सर्व कामगारांची प्रकृती सध्या स्थिर असून कोणालाही जीविताचा धोका नाही. बहुतांश कामगारांना केवळ डोळ्यांची किरकोळ जळजळ झाल्याचे आढळले आहे.

ही घटना नियंत्रणात असली तरी, तारापूर औद्योगिक पट्ट्यात वारंवार घडणाऱ्या अशा घटनांमुळे सुरक्षेच्या उपाययोजनांबाबत प्रश्नचिन्ह निर्माण होत आहे. रासायनिक उद्योगांमध्ये सुरक्षा मानकांचे काटेकोर पालन, नियमित ऑडिट आणि आपत्कालीन प्रतिसाद यंत्रणांची प्रभावी अंमलबजावणी अत्यावश्यक असल्याचे तज्ज्ञांचे मत आहे.

दरम्यान, संबंधित यंत्रणांकडून घटनेची सविस्तर चौकशी सुरू असून निष्काळजीपणाचे कोणतेही पुरावे आढळल्यास कडक कारवाई होण्याची शक्यता व्यक्त करण्यात येत आहे.उपचारासाठी दाखल कामगारांची नावे:

1. Nitesh Oza

2. Jitesh Bhoi

3. Akshay Patil

4. Bikas Kumar

5. Santosh Mule

6. Samir Kumar

7. Sagar Kumar

8. Nilesh Shirdage

9. Pankaj Gautam

10. Swapnil Tare

11. Omkar Dandekar

12. Abhinav Sahu

13. Ashish Dube

14. Manoj Rai

15. Ajay Pandey

16. Amarchand Tandi

17. Ajay Yadav

18. Nitin Chaudhary

19. Mithilesh Jha

20. Chunnu Kumar

21. Aniruddha Gupta

22. Hemant Badane