पालघर | प्रतिनिधी
पालघर तालुक्यातील माहीम रोड, आंबेडकर आळी येथील डॉ. बाबासाहेब आंबेडकर नगर परिसरात मुसळधार पावसामुळे मोठे झाड रस्त्यावर कोसळल्याने वाहतुकीचा खोळंबा झाला. रस्त्याच्या दोन्ही बाजूंना वाहनांच्या रांगा लागल्या होत्या, तर नागरिक, शालेय विद्यार्थी आणि कामानिमित्त प्रवास करणाऱ्या
नागरिकांना मोठ्या अडचणींचा सामना करावा लागत होता.
अशा परिस्थितीत प्रशासन घटनास्थळी पोहोचण्याची वाट
न पाहता डॉ. बाबासाहेब आंबेडकर नगरातील युवकांनी तात्काळ पुढाकार घेतला. सामाजिक जबाबदारीची जाणीव ठेवत सर्व युवक एकत्र आले आणि रस्त्यावर पडलेल्या झाडाच्या फांद्या तसेच खोड बाजूला करण्याचे काम हाती घेतले. काही वेळातच अथक परिश्रमातून त्यांनी रस्ता वाहतुकीसाठी मोकळा करून दिला.
युवकांनी केवळ झाड हटवले नाही, तर रस्त्यावरून जाणाऱ्या वाहनचालकांना आणि पादचाऱ्यांना सुरक्षितपणे मार्गक्रमण करता यावे यासाठीही सहकार्य केले. त्यांच्या तत्परतेमुळे संभाव्य अपघाताचा धोका टळला आणि वाहतूक पुन्हा सुरळीत सुरू झाली.
संकटकाळात कोणत्याही प्रसिद्धीची अपेक्षा न ठेवता समाजहितासाठी पुढे येणाऱ्या या युवकांनी माणुसकी, सामाजिक बांधिलकी आणि एकोप्याचे उत्कृष्ट उदाहरण घालून दिले. प्रशासन येण्यापूर्वीच परिस्थिती नियंत्रणात आणत नागरिकांना दिलासा देण्याचे महत्त्वपूर्ण कार्य त्यांनी केले.
या सेवाभावी कार्याबद्दल डॉ. बाबासाहेब आंबेडकर नगरातील युवकांचे परिसरातील नागरिकांकडून मनापासून कौतुक होत असून, संकटाच्या वेळी समाजासाठी धावून जाण्याची त्यांची वृत्ती इतरांसाठीही प्रेरणादायी ठरत आहे. समाजातील अशीच एकजूट आणि परस्पर सहकार्य हीच कोणत्याही संकटावर मात करण्याची खरी ताकद असल्याची भावना यानिमित्ताने पुन्हा अधोरेखित झाली आहे.