जागरूक आवाज - ताज्या बातम्या आणि घडामोडी

पालघर | प्रतिनिधी : पालघर 

नगर परिषद हद्दीतील महाराणा प्रताप चौक परिसरात असलेल्या महावितरणच्या ट्रान्सफॉर्मरला बुधवारी दुपारच्या सुमारास अचानक आग लागल्याने काही काळ परिसरात भीतीचे वातावरण निर्माण झाले. ट्रान्सफॉर्मरमधून धूर व ज्वाळा बाहेर पडत असल्याचे दिसताच नागरिकांनी घटनास्थळी धाव घेतली. यावेळी सामाजिक कार्यकर्त्यांनी प्रसंगावधान राखत प्राथमिक पातळीवर आग विझविण्याचा प्रयत्न केल्याने मोठा अनर्थ टळला.

घटनेची माहिती मिळताच महावितरणचे कर्मचारी आणि अग्निशमन दलाचे पथक तातडीने घटनास्थळी दाखल झाले. अग्निशमन दलाने अग्निशामक यंत्राच्या साहाय्याने आगीवर नियंत्रण मिळविले, तर महावितरणच्या कर्मचाऱ्यांनी वीजपुरवठा खंडित करून आवश्यक तांत्रिक उपाययोजना केल्या. त्यामुळे संभाव्य मोठी दुर्घटना टळली.

ही घटना शहरातील गजबजलेल्या भागात घडल्याने काही काळ नागरिकांमध्ये घबराट पसरली होती. ट्रान्सफॉर्मरच्या आजूबाजूला दुकाने, वाहतूक आणि नागरिकांची सतत वर्दळ असल्याने परिस्थिती गंभीर बनण्याची शक्यता होती. मात्र सामाजिक कार्यकर्त्यांची तत्परता, नागरिकांचे सहकार्य आणि अग्निशमन दलाच्या जलद प्रतिसादामुळे आग आटोक्यात आणण्यात यश आले.

या घटनेनंतर शहरातील ट्रान्सफॉर्मरची नियमित तपासणी, देखभाल आणि अग्निसुरक्षा उपाय अधिक प्रभावीपणे राबविण्याची गरज पुन्हा एकदा अधोरेखित झाली आहे. नागरिकांनीही अशा घटना घडल्यास स्वतःचा जीव धोक्यात न घालता तातडीने महावितरण व अग्निशमन दलाला माहिती देण्याचे आवाहन करण्यात आले आहे.